Life’s trials are never easy, but each trial in God’s will has a purpose. Life was going smooth for Deepak Saini, a resident of Ambala and a diploma student at a college in Yamunanagar, when time decided to test his capabilities and will power. But it has been rightly said “A gem cannot be polished without friction, nor a man perfected without trials”. Initially disheartened by a drastic change in his life, Deepak paved a way through all the difficulties and ultimately achieved what seems impossible to a normal human being.
When asked about his early life, he says, “Main ek middle class family se belong krta hoon. Main ambala city ka rehne wala hoon. Maine apni 12th science Stream se complete ki. Uske baad maine diploma (Ece) mein admission le liya. Mera admission ambala se 60 km dur Yamunanagar me hua aur hmari classes start hogyi. 1 saal maine full masti ki college mein. Hum 7-8 ladke Ambala se daily up-down krte the by train. Starting mein mummy papa ne bola ki beta hostel lele par mujhe toh daily up-down me mja aane lg gya tha friends k sath.”
Recalling the dreadful day, he shares with us. “Life sahi chal rhi thi ekdum. Mujhe aaj bhi date or time yaad hai. 6 May, 2014 subah 7 : 12am. Meri life ka turning point. Main subah ghar se nikla college jane ke liye lekin pahuncha nahin. Hmari train svere 7:15 pe aati thi aur hum sab daily time se station chale jaate the. Mera friend Umang aur main dono sath jate the. Agar hum dono mein se koi late hota tha, toh fir hum bike se college jate the. Uss din mera friend late tha aur usne subah subah mujhe call krna start krdiya ye bolne k liye ki aaj hum train se nahin jayenge, bike se college jayenge. Par maine uski ek bhi call receive nahin ki. Pta nahin bhagwaan kya chahta tha mujhse.
Main train mein baith gya tha. Ek friend tha mere sath mein. Train chalne hi wali thi. Ek bujurg aunty ne mujhe bola ki beta bahar se paani ki bottles le aayega? Kyonki vo buzurg thi, isliye main bhi mna nahin kar paya. Main unke liye paani ki bottles lene niche chala gyaa. Jab tak main bottles lekar aya train chal chuki thi. Mere dono hathon mein pani ki bottles thi aur chalti hui train me chadh rha tha. Chadte time mera paer slip hogya. Main niche platform par gir gya. Jis dabbe se main gira tha vo to aage nikal gya. Uske baad jo dabba aaya uske andar mera backpack fas gya aur main platform pe ghisdne lga train k sath sath. Sari public khadi hui dekh rhi thi aur dekhte hi dekhte mai train k niche chla gya. Train ka tyre meri left leg ke upar se nikal gya. On the spot meri leg mujhse alag hogyi. Uske baad train ko roka gya. But jab tak vo rukti usne apna kaam krdiya tha.
Mere friend aur ek uncle ne mujhe train k niche se nikala aur platform par leta diya. Mere dost k hosh udd gye mujhe dekh kr, kyonki bohot jyada bleeding ho rhi thi. Mera friend behosh hogya. Uss waqt uske alawa mera aur koi nahin tha wahan par. Main rone lg gya kyonki dard bohat jyada ho rha tha. Main likh kr bhi apna dard byaan nahin kr skta. Sari public mere aas paas khadi hui thi. Koi video bna rha tha, koi photos khinch rha tha but help k liye koi aage nahin aaya. Tbi mera friend Umang jiska maine starting me zikar kiya tha wo aaya. Usne ambulance ko call ki. Mujhe aur meri leg ko uthaya aur mujhe civil hospital ambala le gya. Civil walon ne dressing ki aur PGI chandigarh refer krdiya. Wahan mere parents aaye. Mujhe nhi pta chal rha tha ye ho kya rha hai. Sb ro rhe the.”
Further telling us about the tough time, he says, “ 5 din baad mujhe apna hosh aaya. Maine dekha main hospital mein hun aur meri ek leg mujhse bhagwan ne vapis le li thi. Main toot gya. Mujhe lga meri life khatam.
Ab kuch nahin ho skta. Mujhe poore 20 din hospital me rkha gya uske baad mujhe ghar bhej diya gya. Uske baad sab gnde gnde muhn bna kar bolte the kya hogya bache k sath. Bhagwan ne kaisa kr diya. Mujhe sympathy se nafrat hogyi thi.
2 mahine mein main bilkul theek hogya aur uske baad mujhe college jana tha. Mujhe hostel me rkhwa diya gya. Mujhe bahar jaane mein sharam mehsus hoti thi ki log kya kahenge. Main andar hi andar ghooth raha tha. Jb room me akela hota tha rota rehta tha hostel me baitha hua. Uss waqt mera bhai aur bhai jaisa dost Sachin mera sahara bne. Unhone meri himmat badhai aur main crutches se college aane jane lag gya. Mujhe thoda acha lagne lag gya tha. Par mann mein questions toh aate hi the kyonki normal life se ek dum iss condition mein aana bohat muskil hai. Bhagwan ne pta nahin mujhse kis cheez ka badla liya.
Chalo jaise taise mera diploma college time nikal gya aur main passout hogya. Tb tk mera zakhm bhi majboot ho chuka tha aur maine prosthetic leg k liye doctor se consult kia. Main bohat khush tha ki ab main normal life jiyunga. But vo bohat jyada costly thi. Mere father saab ne loan lekar mujhe vo leg lgwayi. Uske baad mujhe degree k liye jana tha. Mera admission UIET Kurukshetra hogya. Bohat khush tha main but bhagwan ko kuch aur hi manzoor tha.
Maine classes lgana start krdiya but prosthetic leg ki vajah se jyada time main baith nahin skta tha benches pe kyonki leg bilkul hip par aajati thi. Mera college jaana dheere dheere kam hogya. Sath hi meri ek ladke se behas hogyi. Usne mujhe langda bola. Main bilkul dead insaan ki tarah hogya. Mujhe kuch aisa 1st tym sunne ko mila tha. Maine use kuch nahin bola or chup chap hostel aagya. 2-3 din khana nahin khaya. Sad rehne lg gya. Bahar ki duniya se naata hi toot gya mera. Maine akele ne apni ek alag hi duniya bna li thi jisme sirf main aur mere dukh dard the. Mai ghar aagya aur sirf exam dene jata tha. Ghar par bore hota rehta tha sara din. Apne beete dino ko yaad kr kr rota rehta tha andar hi andar. Mere diploma classmates Goutam and Sachin uss time Chandigarh mein training kr rhe the. Maine unko bola aur unhone meri bhi joining krwa di. “
Telling us about the better days, he tells us, “Aur finally main Chandigarh pahunch gya, jahan se meri happy life start hui. Maine un dono ko apni saari story suna di jo bhi main feel karta hoon aur yeh bhi bata diya ki mujhe kaisa lagta hai bahar jaane me. Uske baad ek din subah ki baat hai, main so kar utha hi tha, sachin ne mujhe bola ki dukan se samaan le kar aa hamare liye. Main bhar jaane ke liye leg lgane lga, toh unhone leg bhi nahi lagane di mujhe.. bole ki crutches laga kar hi samaan le aa. Maine apni crutches uthayi aur bahar nikal gya, mujhe bohat zyada awkward lag raha tha. Maine apna muh niche kiya hua tha, aur aise hi main shop par chla gya. Log mujhe ghoor ghoor ke dekh rahe the. Maine shop par ja kar samaan liya, aur shop wale ne mujhe dekh kar smile pass ki. Uske baad unhone meri life hi change krdi.
Jis kaam se main bolta tha ye nhi hoga, voh log mujhse vhi kaam krwate the. Woh mujhse bartan saaf krwaate the. Uske baad mujh mein thoda confidence aaya, mujh mein positivity aayi. Aur main crutches ke sath bhar niklne lg gya. Maine bohat jagah ke tour kiye. Uss waqt mujhe ek alag hi khushi mil rahi thi. Pehle meri crutches simple hoti thi, uske baad mujhe idea aaya ki, kyu na inn par kuch kalakaari ki jaye. Aur maine unhe customize krke batman superman bana diya.
Iske kuch time baad maine apna cricket ka 1st trial diya aur usme meri selection nahi hui. So finally mujhe pata chala ki Chandigarh me disabled persons k liye ek dance event ho raha hai. Maine decide kr liya ki main es event mein participate karunga. Maine Chandigarh Spinal Rehab visit kiya, or wahan par maine dekha jo log apne pairon par stand bhi nahin ho sakte, woh bhi apni life khushi khushi spend kar rahe hain. Unko dekh kar main bohat zyada motivate hua, or wahan ke staff ne mujhe bohat support kiya, unki help se main independent hogya. Apne mind k questions se, mujhe sab ka answer mil chuka tha. Fir maine event mein participate kiya. Maine apni life mein first time dance kiya, aur main bohat zyada khush tha.
Fir meri mulaqat hui Javed Choudhari se. Unke sath time spend krne lag gya. Unhone mujhe bike chlana sikha diya. Thank you Javed bhai. At present main apni life se satisfied hun, independent hun. Mai khush hun ki bhagwan ne mujhe aisa bna diya kyonki jab main normal tha mere pass aim nahi tha.
Bhagwan ka dhanyawaad krta hun mujhe ye life dene ke liye aur unn sabhi mere supporters ka jinhone mere mushkil time mein mujhe sambhala aur iss qabil bnaya ki main life mein kuch kr sakun. Abi main wheelchair cricket aur basketball join krne ki tyari mein hun aur mera ek sapna hai marathon mein participate krne ka jo ab sach hone ja raha hai. Finally main marathon mein ja raha hun.
At present main apni life se bohat khush hoon…main bike chla leta hoon, standing cricket bhi khelta hun.
Mujhe nahin lgta ki main normal hota toh ye sab kar paata. Mujhe iss life mein ek alag hi maza aa raha hai. Maine apni disability ko apni ability bna liya. I am very very happy now.”
It is clear from Deepak’s life journey till now that God places obstacles along our journey to prepare us for the blessings that await at the finish line. Deepak rediscovered his lost happiness once he started believing in himself. A secret to happiness is letting every situation be what it is, instead of what you think it should be.
Do not forget to leave a few words of appreciation